Vi som bur i Sykkylven ønskjer tilreisande velkomen til den vakre, ville og vennlege kommunen vår også i år. Sjølv om fabrikkane stenger dørene sine nokre veker i juli, er bygda full av liv og aktivitet også midt på sommaren. Viss du er interessert i å lære meir om kvifor denne kommunen vart Noreg sin møbelhovudstad, bør du ta ein tur innom utstillinga til Norsk Møbelfaglig Senter i Storgata. Her får du ei kort innføring i møbeleventyret på Sunnmøre. Opningstider kvar kvardag mellom 10.00 og 17.00. Museet har elles lagt til rette for fire opne vandringar gjennom produksjonslokala til Noregs største møbelfabrikk, Ekornes, i sommar. www.mobelfagligsenter.no

Det andre museet i kommunen er Sykkylven Naturhistoriske Museum. Her får du sjå mange av den norske faunaen sine dyr og fuglar, plasserte i naturtru montrar. Kyndig guide er på plass for å vise deg rundt kvar tysdag, onsdag og torsdag mellom 12.00 og 16.00. www.natur-museum.no

Ein av Sykkylven sine mest profilerte turistattraksjonar er den kombinerte møbelverkstaden/kunstgalleriet Cylindra i Tusvika. www.cylindra.no. Her kan du finne utstilt Peter Opsvik sine oppsiktsvekkande møbelskulpturar som har henta inspirasjon frå den mektige naturen på Sunnmøre. Cylindra-galleriet ligg ved vegen mellom Ikornnes og Hundeidvik, idyllisk plassert ved sjøkanten. Følg skilt. Handelssentrumet til kommunen er i kommunesenteret Aure. Her er det butikkar i dei fleste bransjar. Her er også spisestader som har tilbod både på dagtid og om kveldane. Nytt er tilbodet om bilfri hovudgate. Her kan du sitte på utekafe og nyte folkelivet som faktisk kan vere ganske livleg sjølv i eit ferierande Sykkylven. Men det er nok naturen, det storfelte alpelandskapet, den reine lufta og roa som trekk dei fleste til Sykkylven. Fjella og vatna ligg her som før. Her er det lagt til rette for mange fine turopplevingar og løyser du fiskekort kan du fiske i alle vatna. Vi har også eit par gode lakseelevar, Aureelva og Straumen, der det også dei siste åra har vore fiska store laksar og ørretar. Straumen er elles kjent som Nord-Europas kortaste lakseelev. Velkommen til Sykkylven, hjartet på Sunnmøre.